Кантэкст: Паводле дадзеных Мінсельгасхарчу на 21 кастрычніка 2026 года, у Беларусі сабралі 10,3 млн тонаў збожжа з улікам рапсу і кукурузы. Найбольш намалацілі ў Менскай вобласці, следам ішлі Гарадзенская і Берасцейская. Для параўнання: да 22 кастрычніка 2025 года сабралі 9,923 млн тонаў. Прамежкавы вынік 2026 года аказаўся вышэйшым, але гэта яшчэ не азначае, што выніковы ўраджай таксама будзе большы.
19 кастрычніка 2026 года ў праграме «Прапаганда» на АНТ Ігар Тур параўнаў ураджаі збожжа на пачатку кіравання Аляксандра Лукашэнкі і ў 2025 годзе:
«У 1994 годзе ў Беларусі было сабрана 3,5 млн тонаў збожжа. Тады здавалася, што гэта прыстойна. Летась у Беларусі сабрана больш як 11 млн тонаў збожжа з улікам рапсу і кукурузы. Сёлета нібыта будзе яшчэ крыху больш. Што пра гэты ашаламляльны вынік кажа прэзідэнт? Выдатна, але мала. Натуральна, трэба больш».
Аднак у 1994 годзе ў Беларусі сабралі значна больш, чым назваў Тур. Паводле дадзеных Белстату, валавы збор збожжавых і зернебабовых культураў склаў 6,095 млн тонаў. Годам раней ён быў яшчэ вышэйшы — 7,508 млн тонаў.
З паказнікам за 2025 год іншая праблема. Мінсельгасхарч сапраўды паведамляў пра збор больш як 11 млн тонаў, але з улікам рапсу і кукурузы. Рапс — алейная культура, таму ўключаць яго ў параўнанне ўраджаю збожжавых і зернебабовых некарэктна. Паводле дадзеных Белстату, у 2025 годзе збожжавых і зернебабовых сабралі крыху больш як 9 млн тонаў. У параўнанні з 6,095 млн тонаў у 1994-м гэта рост прыкладна на 50%, або ў паўтара разу.
Каб ацаніць вынік у рэгіянальным кантэксце, каманда WTF параўнала змены ўраджаю за 1994—2025 гады ў суседніх краінах. Пры гэтым склад паказнікаў адрозніваецца: для Расеі і Латвіі, як і для Беларусі, улічаныя збожжавыя і зернебабовыя, а для Польшчы і Літвы — толькі збожжавыя.
У Расеі збор збожжавых і зернебабовых вырас з 81,297 млн да прыкладна 141,15 млн тонаў — на 73,6%, паводле дадзеных Расстату.
У Польшчы ўраджай збожжавых павялічыўся з 21,763 млн да 37,335 млн тонаў — на 71,6%, паводле дадзеных польскага статыстычнага ўпраўлення GUS.
У Літве за той жа перыяд збор збожжавых вырас з 2,098 млн да 6,334 млн тонаў — прыкладна ўтрая.
У Латвіі збор збожжавых і зернебабовых павялічыўся з 900,6 тыс. да 3,404 млн тонаў — прыкладна ў 3,8 разу. У дадзеных за 1994 год зернебабовыя ўжо ўключаныя ў паказнік збожжавых, што асобна тлумачыць статыстычнае ўпраўленне краіны.
